Pateges Sekaa Truna Bandhu Hita

1.      Aran Sekaa Truna lan Tegesnyane

Sekaa mapiteges pupulan sane madue katunggalan pikayun lan patitis. Truna mapiteges nyihnayang sekaa puniki kacumponin olih daha Truna. Bandhu Hita mapiteges panunggalan kayun, bawos tur parilaksana sane matetujon ngemanggehang kasukertan sekala niskala. Dadosnyane, piteges tetuek kasuksman Sekaa Truna Bandhu Hita inggih punika, mejalaran sareng ngemiletin dharma prawerti Sekaa Truna Bandhu Hita pinaka genah nunggalang kayun, bawos lan laksana sane matetujon ngemanggehang tetujon kahuripan “Moksartham Jagadhita Ya Ca Iti Dharma”  mejalaran antuk ngelaksanayang tur nincapang srada bhakti ring Ida Sang Hyang Widhi Wasa, ngelaksanayang lan ngawerdiang dharma agama tur dharma negara sane sujati, mikukuhin, ngelestariang, ngerajegang budaya lan jagat Bali sane kedasarin antuk utsaha nincapang kepradnyanan, kedyatmikan, kewicaksanan tur nincapang pikayun kapitresnan, pageh, kukuh, purusa, prawira, satya sane lascarya.

2.      Niyasa lan Tegesnyane :

Ha.   Pralambang Sekaa Truna Bandhu Hita rupan ipun Bucu Lima, pinaka   pralambang mapikukuh antuk Pancasila.

Na.   Sesuratan : Bandhu Hita artos ipun panunggalan kayun, bawos tur parilaksana sane matetujon ngemanggehang kasukertan sekala niskala.

Ca.    Ring jeroning bucu lima punika wenten pralambang-pralambang inggih punika :

1.      Swastika inggih punika wantah lambang Agama Hindu pinaka jiwa Sekaa Truna.

2.      Windhu pinaka nyasa srada bhakti ring Ida Sang Hyang Widhi Wasa pinaka dasar kasusilan ritatkala ngemargiang swadharma mangda prasida ngemolihang tetujon sareng sami.

3.      Candi Bentar pinaka nyasa pemargi ring sajeroning nyujur tetujon ngemagehang, ngelestariang lan ngerajegang budaya lan jagat Bali.

4.      Undagan sane lelima pinaka nyasa Panca Srada inggih punika lima dasar Agama Hindu sajeroning ngemolihang tetujon Agama Hindu “Moksartham Jagadhita Ya Ca Iti Dharma”.

5.      Suar pinaka nyasa kakukuhan lan kepagehan pikayun sane tan rered.

Ra.    Suksman warna sane wenten ring pralambang Sekaa Truna Bandhu Hita inggih punika :

1.      Warna dasar pelung, suksmannyane bobot pikayun sane setate ngalimbakang kapitresnan lan satya ring kahuripan ring sajeroning ngawerdiang kasukertan ring pungkur wekas.

2.      Warna kuning sajeroning windhu, candi bentar, lan undagan sane lima tetuek ipun kepradnyanan, kepagehan pikayun lan kedyatmikan.

3.      Warna barak sajeroning suar pinaka nyasa kapurusan, kaprawiran lan satya.

4.      Warna putih kasuksman ipun kesucian lan kelascaryan.

3.      Upalabi

Sekaa Truna Bandhu Hita maduwe upalabi inggih punika “Moksartham Jagadhita Ya Ca Iti Dharma” sane mapiteges medasar antuk ngelaksanayang dharma irage prasida ngemolihang kesukertan sekala lan niskala.

4.      Kober Utawi Bendera

Sekaa Truna Bandhu Hita maduwe kober utawi bendera sane nganggen warna putih pinaka dasar sane mateges kawentenan wewidangannyane sane magenah ring sisi kangin pulau Bali, warna putih punika manut ring warna sisi kangin sane munggah ring pangider Dewata Nawa Sanga. Sikut kober Sekaa Truna Bandhu Hita inggih punika 120 x 80 cm. Ring madya kober kasurat indik niyasa utawi lambang Sekaa Truna Bandhu Hita. Kober punika setata kabakta ritatkala Sekaa Truna ngawentenang patembungan lan nyarengin pacentokan.

1.      Papalihan lan Among-Amongan Prajuru Sekaa Truna Bandhu Hita

Ha.   Pepalihan Sekaa Truna Bandhu Hita

                                                                                                                      

Na.   Among-Among Prajuru Sekaa Truna Bandhu Hita

Manut sekadi papalihan prajuru ring ajeng, kawentenan prajuru Sekaa Truna Bandhu Hita kepah dados undag-undagan sane madue amongan soang-soang. Amongan-amongan punika nganutin wawidangan sane kagamel sajeroning ngamargiang kaprajuruan. Among-amongan soang-soang prajuru Sekaa Truna Bandhu Hita inggih punika :

1.      Keliang :

Ngamargiang swadharma sane ngawawa sekaa truna inggih punika nuntun pemargin madasar antuk awig-awig lan pararem pinaka sepat siku-siku.

2.      Pangliman I lan II :

Ngewantu angganing Keliang Sekaa Truna sajeroning ngamargiang swadharmannyane taler madasar antuk awig-awig lan pararem pinaka sepat siku-siku.

3.      Patengen I :

Ngaraksa sahananing padruwen sekaa.

4.      Patengen II :

Ngewantu patengen I.

5.      Panyarikan I :

Pinaka juru surat sekaa truna sane nyuratang sahananing pamargin sekaa.

6.      Panyarikan II :

Ngewantu panyarikan I.

7.      Pasayahan Agama :

Ngalaksanayang pamargi sane nyihnayang kawentenan agama.

8.      Pasayahan Lelanguan :

Nglaksanayang parikrama lelanguan minakadi nincapang pamargi soang-soang sekaa lelanguan sane kadruenin olih sekaa.

9.      Pasayahan Wilasa :

Nglaksanayang parikrama wilasa sajeroning nincapang kaweruhan lan kawarasan angganing sekaa truna.

10.  Pasayahan Pekilitan Sekaa :

Ngelanturang nincapang kerumaketan maprekanti ring pakraman.

11.  Pasayahan Kaweruhan :

Ngawangun lan nincapang kaweruhan angganing sekaa truna.

12.  Pasayahan Keasrian :

Ngemit keajegan palemahan ring wewengkon Banjar Takmung.

13.  Pasayahan Utsaha Dana :

Ngemargiang utsaha ring sajeroning nincapang pikolih sekaa truna.

14.  Pasayahan Kawarasan :

Nincapang kawarasan angganing sekaa truna lan nyarengin pamargi utsaha-utsaha nincapang kawarasan majeng ring angganing krama banjar lan krama desa.

15.  Kasinoman :

Ngalanturang kawentenan pamargin sekaa majeng ring keliang sekaa.

16.  Keliang Tempekan :

Ngalanturang kawentenan pamargin sekaa majeng ring angganing sekaa truna.